ತಲೆ ಹರಟೆ!?????????????

ರೆಡ್ಡಿಯೂರಪ್ಪನವರ exclusive ಸಾಧನೆ!!!

2010-06-27T20:59:00.000-07:00

ರೆಡ್ಡಿಯೂರಪ್ಪನವರು ತಮ್ಮ (ಸರ್ಕಾರದಲ್ಲ) ಎರಡು ವರ್ಷದ ಮಹಾನ್ ಸಾಧನೆಯ ಬಗ್ಗೆ ಮೊನ್ನೆ ಸಾಧನ ಸಮಾವೇಶದಲ್ಲಿ ಆನಂದಭಾಷ್ಪದೊಂದಿಗೆ ಆಡಿದ ನುಡಿಮುತ್ತುಗಳಲ್ಲಿ ಒಂದು ಮುತ್ತು(ರೇಣು ಮುತ್ತು ಅಲ್ಲ) ಇಲ್ಲಿದೆ: (exclusively on ತಲೆಹರಟೆ)

..... ಇದುವರೆಗೂ ಯಾವ ಮುಖ್ಯ, ಅಮುಖ್ಯ ಮಂತ್ರಿ, ಕಂತ್ರಿ, ಬೋರೆಗೌಡ, ಹನುಮೆಗೌಡ,ತಿಮ್ಮೆಗೌಡನಾಗಲಿ ಮಾಡದಂತಹ ಸಾಧನೆಯನ್ನು ನಾನು ಮಾಡಿದ್ದೇನೆ.

ಇದುವರೆಗು ನಮ್ಮ ಅಧಿಕಾರಿವರ್ಗಕ್ಕೆ ಸುಸೂತ್ರವಾಗಿ ವ್ಯವಹಾರ ಮಾಡಲು ಅಡ್ಡಿಯಾಗಿದ್ದ ಖಡಕ್ ಹೆಗ್ಡೆಯವರು ರಾಜಿನಾಮೆ ನೀಡುವಂತೆ ಮಾಡಿದ್ದೇನೆ. ಅಧಿಕಾರಿಗಳು ಭಯದ ನೆರಳಲ್ಲಿ ಕೆಲಸಮಾಡಲು ಆಗುವುದಿಲ್ಲ. ಆಗ ಅಭಿವೃದ್ದಿ ಕುಂಟುತ್ತದೆ. ನಮ್ಮ ಅಭಿವೃದ್ಧಿಯೂ ಆಗುವುದಿಲ್ಲ.

ನಾವು ಎಲ್ಲದರಲ್ಲೂ ನಂಬರ್ 1 ಸ್ಥಾನದಲ್ಲಿರಬೇಕು. ಭ್ರಷ್ಟಾಚಾರದಲ್ಲೂ ಸಹ. ಭ್ರಷ್ಟಾಚಾರ ಬಹಳ ಕೆಟ್ಟದು ಹಾಗೆ ಹೀಗೆ ಎಂದು ಇಲ್ಲಸಲ್ಲದ ಆರೋಪ ಮಾಡಲಾಗುತ್ತಿದೆ. ಈಗ ಭ್ರಷ್ಟಾಚಾರ ಮೊಬೈಲ್, ಟಿವಿ ಹಾಗೆ ಜೀವನದ ಒಂದು ಭಾಗ ಆಗಿರುವಾಗ ಅದು ಹೇಗೆ ಕೆಟ್ಟದ್ದು? ಪ್ರಪಂಚದ ಹಳೇ ವೃತ್ತಿಯಾದ ವೇಶ್ಯಾವೃತ್ತಿಯನ್ನು ಹೇಗೆ ನಿರ್ಮೂಲನೆ ಮಾಡಲಾಗುವುದಿಲ್ಲವೋ, ಅದೇ ರೀತಿ ಅಷ್ಟೇ ಹಳೆಯಾದಾದ ಭ್ರಷ್ಟಾಚಾರವನ್ನೂ ನಿರ್ಮೂಲನೆ ಮಾಡಲು ಸಾಧ್ಯವಿಲ್ಲ. ಅದರೊಂದಿಗೆ ಸಹಜೀವನ ನಡೆಸುವುದನ್ನು ನಾವು ಕಲಿಯಬೇಕು. ಭ್ರಷ್ಟಾಚಾರವಿಲ್ಲದೆ ಈ ದುಬಾರಿ ಕಾಲದಲ್ಲಿ ನಾವು ಸರ್ಕಾರಕ್ಕೆ ಭದ್ರತೆ ನೀಡಲು ಸಾಧ್ಯವಿಲ್ಲ.......

(ದಯವಿಟ್ಟು ಕ್ಷಮಿಸಿ, ಇದು ತಮಾಷೆಗಲ್ಲ...)

Hard disk ಗೌಡರ ಮೌನವೄತ ಮತ್ತು ಮಾಜಿಯ 'ಕಾವೇರಿ'ದ ಜೋಕು!!!!

2007-02-09T09:04:00.000-08:00

ಕಾವೇರಿ ವಿಷಯದಲ್ಲಿ ಯಾರ್ ಯಾರು ಎಷ್ಟೆಷ್ಟು ಉಗ್ರವಾಗಿ ಖಂಡಿಸುತ್ತಿದ್ದಾರೆಂದು ಅವರವರೆ ವಿಷ್ಲೇಶಿಸಿಕೊಳ್ಳುತ್ತಿರುವ ಈ 'ಕಾವೇರಿ'ದ ಸಂದರ್ಭದಲ್ಲಿ, ಹಾಲಿ 'ಮಾಜಿ ಪ್ರಧಾನಮಂತ್ರಿ' Hard disk(H D) ದೇವೆಗೌಡರು ಮೌನ ವ್ರತ ಆಚರಿಸುವುದರ ಮೂಲಕ ವಿನೂತನ ರೀತಿಯಲ್ಲಿ ಪ್ರತಿಭಟನೆ ಹಮ್ಮಿಕೊಂಡಿದ್ದಾರೆಯೆಂದು ತಿಳಿದು ಬಂದಿದೆ. ಆದರೆ ಇದನ್ನು ಅರ್ಥ ಮಾಡಿಕೊಳ್ಳದೆ 'ವೄತ್ತಿಪರ' ವಿರೋಧಿಗಳು ಇಲ್ಲಸಲ್ಲದ ಆರೋಪ ಮಾಡುತ್ತಿದ್ದಾರೆಂದು ಗೌಡರು ತಮ್ಮ ಮೌನ ಹೇಳಿಕೆಯ ಮೂಲಕ ದೂರಿದ್ದಾರೆ.

ಈ ಮಧ್ಯೆ, ಕಾವೇರಿಗೆ ಸಂಬಂಧಿಸಿದ ಕರ್ನಾಟಕದೊಂದಿಗಿನ ತನ್ನ ವ್ಯಾಜ್ಯಕ್ಕೆ 'ಪರಿಹಾರ' ದೊರೆತ ನಂತರ ತಮಿಳುನಾಡಿನಲ್ಲಿ ಅಲ್ಲಿಯ ಮಾಜಿ ಮತ್ತು ಹಾಲಿ ಮುಖ್ಯ ಮಂತ್ರಿಗಳ ಮದ್ಯೆ ಇದೇ ವಿಷಯ ಹೋಸ ತಿರುವು ಪಡೆದುಕೊಂಡಿದೆ. ಕಾವೇರಿ ತೀರ್ಪು ತಮಗೆ ಸಮಾಧಾನ ತಂದಿಲ್ಲ ಎಂದು 'ಮಾಜಿ'ಯು ತರಲೆ ತೆಗೆದಿರುವುದಕ್ಕೆ 'ಹಾಲಿ'ಯು, " 'ದೊಡ್ಡ' ಜನರಿಗೆ ಎಷ್ಟು ಕೊಟ್ಟರು ಸಾಲುವುದಿಲ್ಲ. ಮಾಜಿಯ ತಗಾದೆಯನ್ನು ಜೋಕ್ ಆಗಿ ತೆಗೆದುಕೊಳ್ಳಿ" ಎಂದು ಪ್ರತಿಕ್ರಿಯಿಸಿದ್ದಾರೆ. ಇಲ್ಲಿ 'ದೊಡ್ಡ' ಪದವು ಮಾನಸಿಕ ಅರ್ಥದಲ್ಲಿ ಬಳಕೆಯಾಗಿದೆಯೋ ಅಥವ 'ದೈಹಿಕ' ಅರ್ಥದಲ್ಲಿ ಬಳಕೆಯಾಗಿದಿಯೋ ಎಂಬುದು ಇದುವರಗೆ ತಿಳಿದು ಬಂದಿಲ್ಲ.

ಐಶ್ ಮದುವೆಯ multi effects!!!!!

2007-01-30T00:39:00.001-08:00

2010ರಲ್ಲಿ ವಿಶ್ವದಾದ್ಯಂತ ದೂರ ಸಂಪರ್ಕ ಸ್ಥಗಿತಗೊಳ್ಳುತ್ತದೆಯಂತೆ. ಸೂರ್ಯನ ಉಜ್ವಲ ಕಿರಣದಿಂದಾಗಿ ಹೀಗಾಗುತ್ತದೆಯೆಂದು ಹೇಳಲಾಗಿದೆ. ಆದರೆ ಈ ಫೆಬ್ರವರಿ 27 ರಂದು ನಮ್ಮ ಸುದ್ದಿ ಮಾಧ್ಯಮಗಳ ಮೇಲೆ ಪ್ರಭಾವ ಬೀರಬಲ್ಲ ಘಟನೆಯ ಬಗ್ಗೆ ಎಲ್ಲೂ ವರದಿಯಾಗಿಲ್ಲ.

ಅಂದು 'ಐಶ್ ಮದುವೆ' ಎಂಬ ಘಟನೆಯ ತೀಕ್ಷಣ ಪ್ರಭಾವದಿಂದಾಗಿ ಇತರೆ ಎಲ್ಲಾ ಸುದ್ದಿಗಳು ಪತ್ರಿಕೆಗಳಲ್ಲಿ, ಟಿ ವಿ ಚಾನೆಲ್ ಗಳಲ್ಲಿ ಮೂಲೆಗುಂಪಾಗಲಿವೆ. ರಾಜಕಾರಣಿಗಳು,ನೇತಾರರು ಅಂದು ಯಾವುದೇ ಹೇಳಿಕೆಗಳಾಗಲಿ, ವಿರೋಧಿಗಳ ವಿರುದ್ದ ಆರೋಪ ಮಾಡುವುದಾಗಲಿ, ಹೊಸ ಯೋಜನೆ,ಯೋಚನೆಗಳನ್ನು ಪ್ರಕಟಿಸುವುದಾಗಲಿ ಮಾಡುವುದಿಲ್ಲವಂತೆ. 'ಐಶ್ ಮದುವೆ'ಯ ಮಂಗಳ ವಾದ್ಯದ ಅಬ್ಬರದಲ್ಲಿ ಇವರ ಕಿರುಚಾಟ ಕೇಳಿಸುವುದಿಲ್ಲವಾದ್ದರಿಂದ ಎಲ್ಲರೂ ಸರ್ವಸಮ್ಮತದಿಂದ ಈ ನಿರ್ಣಯ ಕೈಗೊಂಡಿದ್ದಾರೆ.

ಈ ಮಧ್ಯೆ, 'ಅಖಿಲ ಭಾರತ ವಿರಹಿಗಳ ಪಕ್ಷ' ಅಸ್ತಿತ್ತ್ವಕ್ಕೆ ಬಂದಿದ್ದು ಹಾಲಿ ನಟ ಹಾಗು ಮಾಜಿ 'ಐಶ್ ಪ್ರೇಮಿ' ಸಲ್ಮಾನ್ ಖಾನ್ ಈ ಪಕ್ಷದ ಅಧ್ಯಕ್ಷರಾಗಿ ಹಾಗು ಇನ್ನೊಬ ನಟ ವಿವೇಕ್ ಒಬೆರಾಯ್ ಉಪಾಧ್ಯಕ್ಷರಾಗಿ ಅವಿರೋಧ ಆಯ್ಕೆಯಾಗಿದ್ದಾರೆ. ಈ ಪಕ್ಷದ ಕರ್ನಾಟಕ ರಾಜ್ಯ ಘಟಕಕ್ಕೆ ರವಿ ಬೆಳಗೆರೆ ಸಾರಥ್ಯ ವಹಿಸಿಕೊಂಡಿದ್ದಾರೆ.

ನಿನ್ನೆ ಮುಂಬಯಿ ಯಲ್ಲಿ ಕರೆದಿದ್ದ ಪತ್ರಿಕಾ ಗೋಷ್ಟಿಯಲ್ಲಿ ಪಕ್ಷದ ಕಾರ್ಯಕ್ರಮಗಳ ಬಗ್ಗೆ ಮಾತಾಡುತ್ತ ರಾಷ್ಟ್ರಧ್ಯಕ್ಷರು, ಫೆಬ್ರವರಿ 14(ಪ್ರೇಮಿಗಳ ದಿನ)ನ್ನು ಕರಾಳದಿನವನ್ನಾಗಿ ಆಚರಿಸಲು ಕರೆ ನೀಡಿದ್ದಾರೆ. ಅಂದು ಬೆಂಗಳೂರಿನಲ್ಲಿ ವಿರಹಿಗಳಿಗೆ ಸಾಂತ್ವನದ ಮಾತುಗಳಿರುವ ಸಿ ಡಿಯನ್ನು ರವಿ ಬೆಳಗೆರೆ ಬಿಡುಗಡೆ ಮಾಡಲಿದ್ದಾರೆ ಎಂದೂ ತಿಳಿಸಿದರು.

ಈ ಬಾರಿಯ ಪ್ರೇಮಿಗಳ ದಿನವನ್ನು ಕರಾಳ ದಿನವನ್ನಾಗಿ ಆಚರಿಸಲು ಕರೆ ನೀಡಿರುವುದರಿಂದ ಅಂದು ಆಗಲಿದ್ದ ಭರ್ಜರಿ ವಹಿವಾಟಿಗೆ ಕೊಡಲಿ ಪೆಟ್ಟು ಬಿದ್ದಿದೆ. ಪ್ರೇಮಿಗಳ ದಿನವನ್ನು ಬಂಡವಾಳವಾಗಿಸಿಕೊಂಡಿದ್ದ ವಾಣಿಜ್ಯ ಸಂಸ್ಥೆಗಳು ಅಪಾರ ನಷ್ಟ ಅನುಭವಿಸುವ ಸೂಚನೆ ಕಂಡು ಬಂದಿದೆ.

ಹೊಸದಾಗಿ ಪ್ರಾರಂಭ ಆಗಿರುವ 'ಅಖಿಲ ಭಾರತ ವಿರಹಿಗಳ ಪಕ್ಷ' ದೇಶದ ರಾಜಕಾರಣದಲ್ಲಿ ಹೊಸ ಅಧ್ಯಾಯ ಪ್ರಾರಂಭಿಸಿದೆ. ಇದರಿಂದ ರಾಜಕೀಯ ಕ್ಷೇತ್ರದಲ್ಲಿ ಯಾವ ತರಹ ಬದಲಾವಣೆಗಳಾಗಬಹುದೆಂದು ಕಾದು ನೋಡಬೇಕಾಗಿದೆ ಎಂದು ರಾಜಕೀಯ ವಿಮರ್ಶಕರು, ಚಿಂತಕರು,ಚಿಂತಿತರು ಅಭಿಪ್ರಾಯ ಪಟ್ಟಿದ್ದಾರೆ.

ಸ್ಫೋಟಕ ಸುದ್ಧಿ?!!!!!!!!!!!!!!!!!!!

2007-01-21T00:30:00.000-08:00

ಇಷ್ಟು ದಿನ ನಿಗೂಢವಾಗಿ ಮಾಯವಾಗಿದ್ದ ತಲೆಬುರುಡೆ ಸಿಕ್ಕಿದೆ. ಮೈ ಕೊಡವಿಕೊಳವಿಕೊಂಡು ಸದ್ಯದಲ್ಲೆ ಇಲ್ಲಿ ಪ್ರತ್ಯಕ್ಷವಾಗಲಿದೆ.
ತನ್ನ ನಿಗೂಢ ಕಣ್ಮರೆಯ ಹಿಂದೆ ಇರುವ ಕಾಣದ, ಕಾಣಿಸುವ,ಕಂಡು ಮರೆಯಾದ ಕೈಗಳ 'ತನಿಖಾ ವರದಿ' ಗಳನ್ನು ಮುಂದಿನ ಎರಡು ಮೂರು ಸಂಚಿಕೆಗಳಲ್ಲಿ ಪ್ರಕಟಿಸುವುದಾಗಿ ನಿಗೂಢ ಲೋಕದಿಂದ ಬಿಡುಗಡೆ ಮಾಡಿರುವ ಹೇಳಿಕೆಯಲ್ಲಿ ತಿಳಿಸಲಾಗಿದೆ.

ಲೋಕಾಯುಕ್ತರಿಂದ ಭ್ರಷ್ಟಾಚರಕ್ಕೆ ಕುಮ್ಮಕ್ಕು?!

2006-07-15T23:16:00.000-07:00

ದಯವಿಟ್ಟು ಕ್ಷಮಿಸಿ. ಅಮುಖ್ಯಮಂತ್ರಿ ಕುಮಾರ ಕಂಠೀರವ ಸಂದರ್ಶನಕ್ಕಾಗಿ ಹೋಗಿದ್ದೆ ಆದ್ದರಿಂದ ಇಷ್ಟುದಿನ ಇಲ್ಲಿ ತಲೆಹರಟೆ ಮಾಡಲಾಗಲಿಲ್ಲ. ಎಷ್ಟು ಕಾಡಿದರು ಬೇಡಿದರೂ ಅವರು ಸಂದರ್ಶನ ಕೊಡಲಿಲ್ಲ. ಆದರೆ ಅಲ್ಲಿಗೆ ಹೋದುದರಿಂದ ಒಂದೆರಡು ಮಾಹಿತಿಗಳು ಸಿಕ್ಕಿವೆ. ಅದನ್ನಿಲ್ಲಿ ನಿಮಗಾಗಿ ಪ್ರಕಟಿಸುತ್ತಿದ್ದೇನೆ.

ಮಾಜಿ ಲೋಕಾಯುಕ್ತ ವೆಂಕಟಚಲ ಅವರನ್ನು ಮುಂದುವರಿಸದಿರುವುದಕ್ಕೆ ಅವರ ವಯಸ್ಸು ಪ್ರಮುಖ ಕಾರಣವಾಗಿದೆ. ಈ ಇಳಿವಯಸ್ಸಿನಲ್ಲೂ ವೆಂಕಟಚಲ ಯುವಕರನ್ನು ನಾಚಿಸುವಸ್ಟು 'ಕೆಲಸ' ಮಾಡುವುದರಿಂದ ಅವರ ಆರೋಗ್ಯದ ಮೇಲೆ ದುಷ್ಪರಿಣಾಮ ಬೀಳುತ್ತದೆಯೆಂದು 'ಲೆಕ್ಕಾಚಾರ' ಹಾಕಿ ಮಾನ್ಯ ಅಮುಖ್ಯಮಂತ್ರಿಯವರು ಲೋಕಾಯುಕ್ತರನ್ನು ಮುಂದುವರಿಸದಿರುವ ನಿರ್ಧಾರವನ್ನು ತೆಗೆದುಕೊಂಡಿದ್ದಾರೆ.

ಇನ್ನೊಂದು ಕಾರಣವೇನೆಂದರೆ, ಅವರನ್ನು ಆ ಹುದ್ದೆಯಲ್ಲಿ ಮುಂದುವರಿಸಿದರೆ ರಾಜ್ಯದಲ್ಲಿ ಭ್ರಷ್ಟಾಚಾರ ಕಡಿಮೆಯಾಗುವ ಬದಲು ಇನ್ನೂ ಹೆಚ್ಚಾಗುವ ಸಂಭವ ಇತ್ತು!

ಭ್ರಷ್ಟಾಚಾರಿಗಳ ಮದ್ಯೆ ಒಂದು ಅಘೋಷಿತ ಸ್ಪರ್ಧೆ ಇದೆ. ಇಲ್ಲಿ ಪ್ರತಿ ಭ್ರಷ್ಟಾಚಾರಿ ಭ್ರಷ್ಟಾಚಾರದ ವಿಷಯದಲ್ಲಿ ಇನ್ನೊಬ್ಬನನ್ನು ಮೀರಿಸುವ ಹುಚ್ಚನ್ನು ಬೆಳಿಸಿಕೊಂಡಿರುತ್ತಾನೆ. ಒಬ್ಬ ಎಷ್ಟು ತಿಂದಿದ್ದಾನೆ ಎಂದು ಗೊತ್ತಾದರೆ ಸಾಕು, ತಾನು ಅವನಿಂಗಿಂತ ಎರಡು ಪಟ್ಟು ತಿನ್ನಬೇಕೆಂದು ಪಣ ತೊಟ್ಟು 'ಕಾರ್ಯ'ಮಗ್ನನಾಗುತ್ತಾನೆ. ಪರಿಸ್ಥಿತಿ ಹೀಗಿರುವಾಗ ವೆಂಕಟಚಲರವರು ಎಲ್ಲಾ ಭ್ರಷ್ಟರ ಒಟ್ಟು 'ಕಮಾಯಿ'ಯ ಸಾರ್ವಜನಿಕ ಪ್ರದರ್ಶನ ಏರ್ಪಡಿಸಿದರೆ ಉಳಿದ ಭ್ರಷ್ಟಾಚರಿಗಳು ಪ್ರದರ್ಶಿಸಲ್ಪಟ್ಟ ಮೊತ್ತದ ದುಪ್ಪಟ್ಟು 'ದುಡಿಯಲು' ಪೈಪೋಟಿಗಿಳಿದು ಸಹಜವಾಗಿ ಭ್ರಷ್ಟಾಚಾರ ಬೆಳೆಯುತ್ತೆ ಹಾಗಾಗಿ ವೆಂಕಟಚಲರವರು ನಿವೃತ್ತಿ ಜೀವನಕ್ಕೇ ಲಾಯಕ್ಕು ಎಂದು ತೀರ್ಮಾನಿಸಿದ್ದಾರೆ.

ಭ್ರಷ್ಟಾಸುರ ಝಿಂದಾಬಾದ್!!!!!

ತಲೆಬುರುಡೆಗೆ ಪಿಂಕ್ ಸ್ಲಿಪ್?!

2006-06-09T09:46:00.000-07:00

ಆತ್ಮೀಯ ನೆಟ್ ಅಲೆಮಾರಿಗಳೆ ಹಾಗು ಇತರರೆ,

ಬದಲಾವಣೆ ಈ ಜಗದ ನಿಯಮ. ಅನಾದಿಕಾಲದಿಂದ ಇಂದಿನವರೆಗೆ ಏನೇನೊ ಬದಲಾಗಿದೆ. ಆದರೆ ಬದಲಾಗದಿರುವುದು ಈ ನಿಯಮ ಮಾತ್ರ.

ಬದಲಾವಣೆ ಈ ಜಗದ ನಿಯಮ ಎನ್ನುವುದನ್ನು ಈಗಿನ ಆಧುನಿಕ ಕಾಲದವರು ಚೆನ್ನಾಗಿ ಮನದಟ್ಟು ಮಾಡಿಕೊಂಡಿದ್ದಾರೆ. ಹಾಗಾಗಿ ರಾಜಕಾರಣಿಯಿಂದ ಜನಸಾಮಾನ್ಯನವರೆಗೂ, ಮೊಟಾರು ಕಂಪನಿಯವರಿಂದ ಹಿಡಿದು ಮೊಬೈಲ್ ಕಂಪನಿಯವರವರೆಗೂ ಈ ನಿಯಮ ಚಾಚು ತಪ್ಪದೆ ಪಾಲಿಸಲಾಗುತಿದೆ. ಇವರಲ್ಲಿ ರಾಜಕಾರಣಿಗಳು ಮುಂಚೂಣಿಯಲ್ಲಿದ್ದಾರೆ. ಇವತ್ತು ಈ ಪಕ್ಷ, ನಾಳೆ ಇನ್ನೊಂದು. ಅದರ ನಂತರ ತಮ್ಮದೇ ಹೊಸತೊಂದು!

ಜನಸಾಮಾನ್ಯನ ವಿಷಯಕ್ಕೆ ಬಂದರೆ, ಇವತ್ತು Nokia2600 handset ಒಂದಿಷ್ಟು ದಿನಗಳ ನಂತರ ನೀಲಿ ಹಲ್ಲು(blue tooth) ಇರುವ ಮೊಬೈಲ್. ಒಂದಿಷ್ಟು ತಿಂಗಳ ನಂತರ ಅದಕ್ಕಿಂತ advanced set. ಒಂದಿಷ್ಟು ದಿನ Spice ಜತೆ ಚೆಲ್ಲಾಟ, ಮುಂದೆ Airtel ನೊಂದಿಗೆ ಚಕ್ಕಂದ. ಅದಾದ ಮೇಲೆ Hutch ನ ಸಹವಾಸ.

ಇನ್ನು ಜನ'ಅಸಾಮಾನ್ಯರ' ವಿಷಯ: ಇಂದು ಇವಳೊಂದಿಗೆ / ಇವನೊದಿಗೆ 'ಒಡನಾಟ', ನಾಳೆ ಇನ್ನ್ಯಾರಿಗೋ ಆ ಸ್ಥಾನ. ಮುಂದೊಂದು ದಿನ ಮತ್ತ್ಯಾರೊಂದಿಗೊ ಜೀವನ 'ಹಂಚಿಕೆ'!!!!

'ತಲೆಹರಟೆ'ಗೂ ಈ ನಿಯಮದಿಂದ ವಿನಾಯಿತಿ ಇಲ್ಲ. ನೀವೆಲ್ಲಾ ಈ ಬ್ಲಾಗ್ ನಿವೇಶನಕ್ಕೆ ಭೇಟಿ ಕೊಟ್ಟು, ಅಭಿಪ್ರಾಯಗಳನ್ನು ದಾಖಲಿಸಿ,ಮೆಚ್ಚುಗೆಯ ಮಾತನ್ನು ಆಡಿ ಪ್ರೋತ್ಸಾಹಿಸಿದ್ದೀರಿ. ಇದಕ್ಕೆ ನಾನು ನಿಮಗೆ ಚಿರಋಣಿ. ಇಲ್ಲಿ ಪಕ್ಕದಲ್ಲಿರುವ ತಲೆಬುರುಡೆ ಇಷ್ಟು ದಿನಗಳ ನಂತರ ಅದೇಕೊ irritating ಅನ್ನಿಸುತ್ತಿದೆ. ಇಷ್ಟು ದಿನ ಈ ನಿವೇಶನದ ಮೇಲೆ ಯಾರ 'ದೃಷ್ಟಿಯೂ ಬೀಳದಂತೆ' ನೋಡಿಕೊಂಡಿದಕ್ಕೆ ಹೃತ್ಪೂರ್ವಕ ಧನ್ಯವಾದಗಳನ್ನು ಸಲ್ಲಿಸಿ ಒಂದು ಪಿಂಕ್ ಸ್ಲಿಪ್ ನೀಡಬೇಕೆಂದುಕೊಂಡಿದ್ದೇನೆ. ನನಗೆ ಇದರ ಬಗ್ಗೆ ನಿಮ್ಮ ಅಭಿಪ್ರಾಯದ ತೀವ್ರ ಅವಶ್ಯಕತೆ ಇದೆ. ಈ ತಲೆಬುರುಡೆ ಇಲ್ಲಿರುವುದರಿಂದ ನಿಮಗೇನು ಅನ್ನಿಸಿದೆ, ಇದನ್ನು ಬದಲಾಯಿಸಬೇಕಾ ಅಥವ ಅದರಪಾಡಿಗೆ ಅದನ್ನು ಅಲ್ಲಿಯೇ ಬಿಡಬೇಕಾ? ಎಂದು ತಿಳಿಸಬೇಕಾಗಿ ವಿನಂತಿ.

ಇಂತಿ
ತಲೆಹರಟೆ

ಆಷ್ಟ್ರೇಲಿಯನ್ನರು: ಭಾರತದ ಜನಸಂಖ್ಯೆ ಹೆಚ್ಚಳಕ್ಕೆ ಕಾರಣರು

2006-06-06T10:37:00.000-07:00

ತಲೆಹರಟೆ ಹೆಸರಿನ ಈ ಲದ್ದಿಗಾರನಿಗೆ ಬಹಳ ಸಂತೋಷವಾಗಿದೆ. ತನ್ನ ಗಂಭೀರ ಮಾತುಗಳನ್ನು ತಮಾಷೆಯಾಗಿ, ತಮಾಷೆ ಮಾತನ್ನು ಗಂಭೀರವಾಗಿ ತೆಗೆದುಕೊಳ್ಳುತ್ತಾರೆ ಎಂದು ಸಿಕ್ಕಸಿಕ್ಕವರೆಲ್ಲಾ ಬಳಿ ಗೊಣಗುತ್ತಿದ್ದವನಿಗೆ ಇತ್ತಿಚಿಗೆ ಸಿಕ್ಕ ಪುಟ್ಟ ಸುದ್ಧಿಯೊಂದು ಈ ಸಂತೋಷಕ್ಕೆ ಕಾರಣ.

ಪೀಟರ್ ಕಾಸ್ಟಿಲ್ಲೊ ಎಂಬ ಆಸ್ಟ್ರೇಲಿಯದ ಪ್ರಮುಖ ವ್ಯಕ್ತಿ ಒಬ್ಬ ೧೯೯೨ ರಲ್ಲಿ ಆಸ್ಟ್ರೆಲಿಯನ್ ಜನತೆಯನ್ನು ಕುರಿತು "ದಂಪತಿಗಳು ಹೆಚ್ಚು ಹೆಚ್ಚು ಮಕ್ಕಳನ್ನು ಪಡೆಯಬೇಕು. ಒಂದು ಮಗು ಪಪ್ಪನಿಗೆ, ಒಂದು ಮಮ್ಮಿಗೆ ಇನ್ನೊಂದು ದೇಶಕ್ಕೆ.." ಎಂದು ತಮಾಶೆಗೆ ಹೇಳಿದ ಮಾತು ಈಗ ಗಂಭೀರ ಸಮಸ್ಯೆ ಉಂಟುಮಾಡಿದೆ!!

೧೯೯೨ ರಿಂದ ಈಚೆಗೆ ೨೦೦೫ರಲ್ಲಿ ಮೊದಲಬಾರಿಗೆ ೨೬೧೪೦೦ ಮಕ್ಕಳು ಇಲ್ಲಿ ಜನಿಸಿದ್ದಾರೆ. ಇದು ಅಲ್ಲಿಯ ಸರಕಾರಕ್ಕೆ ತಲೆನೊವಾಗಿ ಪರಿಣಮಿಸಿದೆ. ಹೀಗಾಗಿ ಅಲ್ಲಿಯ ಸರ್ಕಾರ "ರಾಷ್ಟ್ರದ ಹಿತದೃಷ್ಟಿಯಿಂದ ಹಾಗು ರಾಷ್ಟ್ರ ಪ್ರೇಮದ ಸಲುವಾಗಿ ಒಂದೇ ಮಗು ಪಡೆಯಿರಿ" ಎಂದು ತನ್ನ ಜನತೆಯಲ್ಲಿ ವಿನಂತಿಸಿಕೊಂಡಿದೆ.

ಈ ಮಧ್ಯೆ,ಆಷ್ತ್ರೇಲಿಯನ್ ಜನತೆ ತನ್ನ ತಮಾಷೆ ಮಾತನ್ನು ಇಷ್ಟು ಗಂಭೀರವಾಗಿ ತೆಗೆದುಕೊಡಿರುವುದು ತನಗೆ ಆಶ್ಚರ್ಯವಾಗಿದೆ ಎಂದು ಪೀಟರ್ ಕಾಸ್ಟಿಲ್ಲೊ ಹೇಳಿಕೊಂಡಿದ್ದಾನೆ. ಆಶ್ಟ್ರೇಲಿಯನ್ ಸರ್ಕಾರದ 'ಒಂದೇ ಮಗು ಸಾಕು' ಎಂಬ ಗಂಭೀರ ಕರೆಯನ್ನು ಅಲ್ಲಿಯ ಜನ ತಮಾಷೆ ಎಂದು ಭಾವಿಸದಿರಲಿ ಎಂಬುದು ತಲೆಹರಟೆಯ ಆಶಯ.

(೨೦೦೫ ರಲ್ಲಿ ಭರತದ ಜನಸಂಖ್ಯೆ ಎಂದಿಗಿಂತ 'ಅತಿ' ಹೆಚ್ಚಾಗಿದ್ದರೆ ಅದಕ್ಕೆ ಭಾರತಿಯರಾದ ನಾವು ಕಾರಣರಲ್ಲ! ಏಕೆಂದರೆ ಜನಸಂಖ್ಯಾ ತಜ್ಞರ ಪ್ರಕಾರ ಭಾರತದ ಜನಸಂಖ್ಯೆಗೆ ಪ್ರತಿವರ್ಷ ಒಂದು ಆಸ್ಟ್ರೇಲಿಯ ಸೇರ್ಪಡೆಯಾಗುತ್ತಿದೆಯಂತೆ. ಹಾಗಾಗಿ ಆಶ್ತ್ರೇಲಿಯದ ಜನಸಂಖ್ಯೆ ಹೆಚ್ಚಾದರೆ ಸಹಜವಾಗಿ ಭಾರತದ ಜನಸಂಖ್ಯೆಯೂ ಅಷ್ಟೇ ಹೆಚ್ಚಬೆಕಲ್ಲವೇ?)

ಗೌಡರ ತುಟಿಯಂಚಿನಲ್ಲಿ ತುಂಟನಗೆ?

2006-05-27T07:40:00.000-07:00

ಹಾಲಿ ಮಾಜಿ ಪ್ರಧಾನಿ ಡಿ ಗೌಡರಿಗೆ ಪತ್ರಕರ್ತರೆಂದರೆ ಅಷ್ಟಕಷ್ಟೆ. ಅವರ ಪ್ರಕಾರ ಪತ್ರಕರ್ತರೆಲ್ಲಾ ತಲೆಹರಟೆಗಳು. ಅದರಲ್ಲೂ ನನ್ನ ಹೆಸರೇ ತಲೆಹರಟೆ ಎಂದಿರುವಾಗ ಕೇಳಬೇಕೆ? ಅಂತು ಇಂತು ಕಷ್ಟಪಟ್ಟು ಸಂದರ್ಶನ ಪಡೆಯುವಷ್ಟರಲ್ಲಿ ನನ್ನ ತಲೆ ಹನ್ನೆರಡಾಣೆ ಆಗಿ 'ತಲೆಹರಟೆ'ಗೆ ತಲೆಯೇ ಇಲ್ಲ ಎನ್ನುವ ಹಾಗಾಗಿದೆ. ಆದರೆ ಸಂದರ್ಶನ ವೇಳೆ ಆಡಿದ ಮಾತುಗಳೆಲ್ಲಾ ಆಫ್ ದಿ ರೆಕಾರ್ಡ್!! ಆದರೂ ಧೈರ್ಯ ಮಾಡಿ ಸಂದರ್ಶನದ ಒಂದೆರಡು ತುಣುಕುಗಳನ್ನು ಇಲ್ಲಿ ನೀಡಿದ್ದೀನಿ.

ತಲೆಹರಟೆ: ಗೌಡ್ರೇ ನಿಮ್ಮ ಇದುವರೆಗಿನ ಮಹತ್ತರ ಸಾಧನೆ ಯಾವುದು?

ಗೌಡ್ರು: ಮಗನನ್ನು ಸಿ ಎಮ್ ಮಾಡಿದ್ದು. ಇದು ಆಫ್ ದಿ ರೆಕಾರ್ಡ್. ಪತ್ರಿಕೆಯಲ್ಲಿ ಪ್ರಕಟಿಸಬೇಡಿ.

ತಲೆಹರಟೆ: ನೀವು ಕೆಲವು ತಿಂಗಳ ಹಿಂದಿನವರೆಗೂ ಸರಾಸರಿ ದಿನಕ್ಕೊಂದು ಪತ್ರ ಬರೆಯುತ್ತಿದ್ದರಲ್ಲ. ಈಗೇಕೆ ನಿಮ್ಮ ಪತ್ರಗಳು ಅಪರೂಪ ಆಗಿಬಿಟ್ಟಿದೆ.

ಗೌಡ್ರು: ವಯಸ್ಸಾಯಿತು. ಪತ್ರ ಬರೆದು ಬರೆದು ಸುಸ್ತಾಗಿದ್ದೀನಿ. ಸ್ವಲ್ಪ ಸುಧಾರಿಸಿಕೊಳ್ಳೋಣ ಎಂದು ಸುಮ್ಮನಾಗಿದ್ದೀನಿ. ಹದಿನಾರು ತಿಂಗಳು ರೆಸ್ಟ್. ಆಮೇಲೆ ನೋಡಿ ಮತ್ತೆ ಪ್ರಾರಂಭ ಆಗುತ್ತೆ ನನ್ನ ಪತ್ರಾವಳಿ! (ಪತ್ರ ಹಾವಳಿ? ಆಡಳಿತ ಹಂಚಿಕೆ ಸೂತ್ರದ ಪ್ರಕಾರ ಇನ್ನು ಹದಿನಾರು ತಿಂಗಳ ನಂತರ ಮಂಡಿಊರಿ-ಯಡಿಯೂರಿ ಅಲ್ಲ-ಎಂಬುವವರು ಮುಖ್ಯ ಮಂತ್ರಿ ಆಗಲಿದ್ದಾರೆ....ಸಂದರ್ಶಕ).

ತಲೆಹರಟೆ: ನೀವು ಸೋನಿಯಾಗೂ ಪತ್ರ ಬರೆಯುತ್ತಿದ್ದರಲ್ಲಾ ಆಗ ನಿಮ್ಮ ಧರ್ಮಪತ್ನಿ ಏನು ಅನ್ನುತಿರಲ್ಲಿಲ್ಲವಾ?

ಗೌಡ್ರು: ..............................(ಗೌಡರ ತುಟಿಯಂಚಿನಲ್ಲಿ ತುಂಟನಗೆಯೊಂದು ಮಿಂಚಿ ಮಾಯವಾಯಿತು)

ಭ್ರಷ್ಟಾಚಾರ ಕಾಣಿಸದಂತೆ 'ಕಾರ್ಯ' ನಿರ್ವಹಿಸಿ: ಮು ಮಂತ್ರಿ

2006-05-21T05:59:00.000-07:00

ವರ್ಗಾವಣೆ 'ಜಾತ್ರೆ'ಯಲ್ಲಿ ತಿಂದುಂಡು ತೇಗುತ್ತಿರುವ ಭ್ರಷ್ಟಾಸುರನ ರೌದ್ರ ನರ್ತನದ ಬಗ್ಗೆ ವಿ.ಕ ಪತ್ರಿಕೆಯು 'ವರ್ಗ:ದುಡ್ಡು ಮಾಡೋರ ಸ್ವರ್ಗ' ಹೆಸರಿನ ಎಫ್ ಐ ಆರ್ ದಾಖಲಿಸಿದನ್ನು(ಮೇ ೧೭,೨೦೦೬) ಕಂಡು 'ಎಚ್ಚೆತ್ತು'ಕೊಂಡಿರುವ ಮಾನ್ಯ ಮು.ಮಂತ್ರಿ ಅಧಿಕಾರಿಗಳೊಂದಿಗೆ ತುರ್ತು ಸಮಾಲೋಚನ ಸಭೆಯನ್ನು ನಡೆಸಿ ವರ್ಗಾವಣೆ ವಿಚಾರದಲ್ಲಿ ಕಟ್ಟೆಚ್ಚರ ವಹಿಸುವಂತೆ ಅಧಿಕಾರಿಗಳಿಗೆ ತಾಕೀತು ಮಾಡಿದ್ದಾರೆಂದು ಅದೇ ಪತ್ರಿಕೆ ವರದಿ ಮಾಡಿದೆ(ಮೇ ೧೮,೨೦೦೬).

ಆದರೆ ಆ ಪತ್ರಿಕೆಯು ತನ್ನ ವರದಿಯಲ್ಲಿ ಸ್ಥಳ ಅಭವಾದಿಂದಲೋ ಅಥವ ಮುದ್ರರಾಕ್ಷಸನ ಹಾವಳಿಯಿಂದಲೋ ಬಹು ಮುಖ್ಯ ಮಾಹಿತಿಯನ್ನು ಕೈ ಬಿಟ್ಟು ಅಪೂರ್ಣ ವರದಿಯನ್ನು ನೀಡಿದೆ.

ಪ್ರಕಟವಾಗಿರುವ ವರದಿಯು "ವರ್ಗಾವಣೆ ವಿಚಾರದಲ್ಲಿ ಕಟ್ಟೆಚ್ಚರ ವಹಿಸುವಂತೆ ಮು ಮಂತ್ರಿ ಹೆಚ್.ಡಿ.ಕೆ.ಸ್ವಾಮಿ ಅಧಿಕಾರಿಗಳಿಗೆ ತಾಕೀತು ಮಾಡಿದ್ದಾರೆ" ಎಂಬ ಸಾಲಿನೊಂದಿಗೆ ಪ್ರಾರಂಭವಾಗಿ, "ಭ್ರಷ್ಟಾಚಾರ ಕಂಡು ಬಂದರೆ ತಪ್ಪಿತಸ್ಥರ ವಿರುದ್ದ ಕ್ರಮ ಕೈಗೊಳ್ಳುವಂತೆ ಮುಖ್ಯ ಕಾರ್ಯದರ್ಶಿಗೆ ಸೂಚನೆ ನೀಡಿದರು" ಎಂಬ ಸಾಲಿನೊಂದಿಗೆ ಕೊನೆಗೊಳ್ಳುತ್ತದೆ.

ಆದರೆ ತಲೆಹರಟೆ ಎಂಬ ಲದ್ದೀಗಾರನ ಪ್ರಕಾರ ವಿ.ಕ ದಲ್ಲಿ ಪ್ರಕಟವಾಗಿರುವ ಮೂಲ ವರದಿಯ ಪ್ರಾರಂಭಿಕ ಸಾಲು ಹೀಗಿದೆ:"ವರ್ಗಾವಣೆಗೆ ಸಂಬಂಧಿಸಿದ ಒಂದೂ 'ಕೇಸು' ಸಹ 'ಹೊರಗಿನ'ವರಿಗೆ ಗೊತ್ತಾಗದಂತೆ ಕಟ್ಟೆಚ್ಚರವಹಿಸುವಂತೆ ಮು.ಮಂತ್ರಿ ಅಧಿಕಾರಿಗಳಿಗೆ 'ತಾಕೀತು' ಮಾಡಿದ್ದಾರೆ".ಕೊನೆಯ ಸಾಲು "ಭ್ರಷ್ಟಾಚಾರ ಕಂಡು ಬಂದರೆ 'ತಪ್ಪಿತಸ್ಥರ' ವಿರುದ್ದ ಕ್ರಮ ಕೈಗೊಳ್ಳಲಾಗುವುದು. ಆದ್ದರಿಂದ ಭ್ರಷ್ಟಾಚರ ಕಂಡು ಬಾರದಂತೆ 'ಕಾರ್ಯ' ನಿರ್ವಹಿಸುವಂತೆ ಸೂಚಿಸಲು ಮುಖ್ಯ ಕಾರ್ಯದರ್ಶಿಗೆ ಆದೇಶ ನೀಡಿದರು".

ಜೈ ಭ್ರಷ್ಟಾಸುರ!!!!!!!

ನೂರು ದಿನ ಪೂರೈಸಿದ `ಸರ್ಕಾರ್' `ಸಿನಿಮಾ'!!!

2006-05-14T05:47:00.000-07:00

ಎಲ್ಲಾ ಸಿನೆಮಾಗಳಲ್ಲಿ ಮಧ್ಯಂತರ ಇನ್ನೇನು ಒಂದೆರಡು ಕ್ಷಣಗಳಿರುವಾಗ ಕತೆಗೆ ಒಂದು ತಿರುವು ಬಂದು ವೀಕ್ಷಕರ ಕುತೂಹಲ ಕೆರಳಿಸುತ್ತದೆ. ಆದರೆ ಈ ಶನಿವಾರ(13.05.06) ನೂರು ದಿನ ಪೂರೈಸಿದ `ಸಿನಿಮಾ' ಮಾತ್ರ ವಿಭಿನ್ನ ರೀತಿಯದು. ಹೆಸರು `ಸರ್ಕಾರ್'. ಇದು ಪ್ರಾರಂಭ ಆಗಿದ್ದೆ ಒಂದು ವಿಚಿತ್ರ `ತಿರುವು' ನಿಂದ!

ಇನ್ನೊಂದು ವಿಶೇಷ ಎಂದರೆ ಈ (ವಿ)ಚಿತ್ರದಲ್ಲಿ ನಾಯಕ ಯಾರು ಖಳನಾಯಕನಾರು ಎಂಬ ಗೊಂದಲ ಪ್ರಾರಂಭದಿಂದಲೂ ಕಾಡುತಿದೆ. ಡೈಲಾಗ್ ವಿಷಯದಲ್ಲಿ ಎಲ್ಲಾ ಸಿನಿಮಾಗಳನ್ನು ಹಿಮ್ಮೆಟ್ಟಿಸುತ್ತದೆ. ಶೆಟ್ಟರ್ ಹೆಸರಿನ ಮಂತ್ರಿ ಪಾತ್ರವೊಂದು ಈ ಡೈಲಾಗ್ ಹೆಳುತ್ತೆ-"ಕಂದಾಯ ಇಲಾಖೆಯಲ್ಲಿ ಯಾರಾದರು ಲಂಚ ಕೇಳಿದರೆ ನೇರವಾಗಿ ಅವರ ವಿವರಗಳನ್ನು ನನ್ನ ಮೊಬೈಲ್ ಗೆ ಕರೆ ಮಾಡಿ ತಿಳಿಸಿ. ನಾನು ಕ್ರಮ ತೆಗೆದುಕೊಳ್ಳುತ್ತೇನೆ" ಎಂದು. ಪತ್ರಿಕೆಗಳ ಮೂಲಕ ಮೊಬೈಲ್ ನಂಬರ್ ಜನತಾಜನಾರ್ಧನ್ ಗೆ ದೊರೆಯುತ್ತದೆ. ಆದರೆ ಮುಂದೇನಾಯಿತು ಎಂದು ಕೇಳಬೇಡಿ. ಆ ಮೊಬೈಲಿಗೆ ಎಷ್ಟು ದೂರುಗಳು, ಅವುಗಳಲ್ಲಿ ಕ್ರಮ ತೆಗೆದುಕೊಂಡಿದ್ದೆಷ್ಟು ಎಂಬುದರ ಬಗ್ಗೆ ಒಂದಿಷ್ಟೂ ಮಾಹಿತಿ ಇಲ್ಲ.

"ಲೋಕಾಯುಕ್ತರಿಗೆ ಹೆಚ್ಚಿನ ಅಧಿಕಾರ ಕೊಡಲಾಗುವುದು" ಎಂಬುದು ಆಗಾಗ ಕೇಳಿ ಬರುವ ಡೈಲಾಗು.

ಇನ್ನೊಂದು ವಿಶೇಷ ಎಂದರೆ ಅ ಒಂದೇ ಚಿತ್ರಕ್ಕೆ ಹಲವು ನಿರ್ದೇಶಕರು!!!!!!

ಈ ಸಿನಿಮಾ ನೂರು ದಿನ `ಓಡಿ'ದ್ದರು ಸಹ ಬಾಕ್ಸ್ ಆಫೀಸ್ `ಕಮಾಯಿ' ಅಷ್ಟಕಷ್ಟೆ ಎಂಬ ಸೂಚನೆ ದೊರೆತಿದೆ. ಏಕೆಂದರೆ, ನೂರು ದಿನ ಪೂರೈಸಿದ ಸಂದರ್ಭದಲ್ಲಿ ಈ ಸಿನಿಮಾದ ಪ್ರಮುಖ ಪಾತ್ರ(ನಾಯಕ?) ತನ್ನ ಸಂದರ್ಶನದಲ್ಲಿ"ಈ ನೂರು ದಿನ ನನಗೆ ತೃಪ್ತಿ ನೀಡಿಲ್ಲ" ಎಂದು ಅಸಮಾಧಾನ ವ್ಯಕ್ತಪಡಿಸಿದೆ.

ವೆಬ್ ಅಲೆಮಾರಿಗಳೇ! ದಯವಿಟ್ಟು ಗಮನದಲ್ಲಿಡಿ;ಈ ಚಿತ್ರದ ಅವಧಿ 40 ತಿಂಗಳು!!!!!! ಆದರೆ ಅದಕ್ಕಿಂತ ಮುಂಚೆಯೂ ಮುಗಿಯಬಹುದು!

ಅಹಾ! ಎಂತಹ ಹೊಂದಾಣಿಕೆ!!!!!!!!

2006-05-11T21:08:00.000-07:00

ಕುಮಾರಿ ಜಯಲಲಿತಗೆ `ಕರುಣಾ'ಜನಕ ಸೋಲು, ಕರುಣಾನಿಧಿಗೆ `ಜಯ'ಮಾಲೆ. ಒಂದು ಅವಧಿಗೆ ಜಯಲಲಿತಾ, ಇನ್ನೊಂದು ಅವಧಿಗೆ ಕರುಣಾನಿಧಿ. ಇದು ಹಿಂದಿನಿಂದಲೂ ನಡೆದು ಬಂದ `ಸಂಪ್ರದಾಯ'. ಇದು ಯಾರ ಗೆಲವೂ ಅಲ್ಲ ಸೋಲೂ ಅಲ್ಲ; ಅದ್ಭುತ ಹೊಂದಾಣಿಕೆಯಷ್ಟೆ!!!!
ಒಂದು ಅವಧಿಗೆ ಇವರು ಆಡಳಿತ ನಡೆಸಿ ಬಾಚಿಕೊಳ್ಳುವುದು, ಇನ್ನೊಂದು ಅವಧಿಗೆ ಇನ್ನೊಬ್ಬರಿಗೆ ಅವಕಾಶ ಮಾಡಿಕೊಡುವುದು. ಈ ಹಿಂದಿನ ಐದು ವರ್ಷದಲ್ಲಿ `ಬಾಚಿ'ರುವುದನ್ನು ಸರಿಯಾಗಿ ಜೋಡಿಸಿ ಕೊಳ್ಳಬೇಕಲ್ಲ, ಅದಕ್ಕೆ ಈಗ ಜಯಲಲಿತಾಗೆ ಐದು ವರ್ಷ ಕಾಲಾವಕಾಶ ನೀಡಿರುವುದು. ಈಗ ಕರುಣಾನಿಧಿ ಬಾಚಿಕೊಳ್ಳುತ್ತಾರೆ. ಆಮೇಲೆ ಅವರಿಗೆ ಐದು ವರ್ಷ ರೆಸ್ಟ್. ಹೇಗಿದೆ ಭಲೇ ಜೋಡಿ?

ಮೊದಲ ಮಾತು

2006-05-05T20:22:00.000-07:00

ಜನ ನನ್ನ ಗಂಭೀರ ಮಾತುಗಳನ್ನು ತಮಾಷೆಯಾಗಿ ಭಾವಿಸುತ್ತಾರೆ, ತಮಾಷೆ ಮಾತನ್ನು ಗಂಭಿರವಾಗಿ ಪರಿಗಣಿಸುತ್ತಾರೆ. ಅದೇ ನನ್ನ ಅಸಲಿ ಸಮಸ್ಯೆ!!!!!!!!!!
ಇರಲಿ. ನನ್ನ ಅಸಲಿ ಮತ್ತು ನಕಲಿ(?) ಸಮಸ್ಯೆಗಳನ್ನು ಚರ್ಚಿಸಲು ಅಲ್ಲ ಈ ಅಂತರ್ಜಾಲ ಪುಟ ಇರುವುದು...........

`ಮುಕ್ತ'ದ ಮುಕ್ತಾಯದ ಬಗ್ಗೆ ಒಂದು ಮುಕ್ತ ಅಭಿಪ್ರಾಯ

2006-05-05T20:14:00.000-07:00

ಎಲ್ಲರ ಹಾಗೆ ನಾನೂ ಪ್ರತಿ ದಿನ ಟಿ ವಿ ನೋಡುತ್ತೆನೆ. ನನ್ನ ರೂಮಿನಿಂದ ಹೊರಗೆ ಬಂದಾಗ, ಕುಳಿತಾಗ, ಹೊರಗಿನಿಂದ ಮನೆಯೊಳಗೆ ಬಂದಾಗ, ನಿಂತಾಗ, ದೂರವಾಣಿಯಲ್ಲಿ ಹರಟೆ ಹೊಡೆಯುವಾಗ.......ಯಾವಾಗಲು ಟಿ ವಿ ನೋಡುತಿರುತ್ತೇನೆ. ನಮ್ಮಲ್ಲಿ ಎಲ್ಲರೂ ನೋಡುತ್ತಾರೆ. ಅಷ್ಟೇಕೆ, ನನ್ನ ಆರು ತಿಂಗಳ ಮಗಳೂ ಸಹ ನೋಡುತ್ತಾಳೆ! ಆದರೆ ಅದು ಯಾವಾಗಲು ಆಫ್ ಆಗಿರುತ್ತೆ!

ನಮ್ಮ ಮನೆಯಲ್ಲಿ ಟಿ ವಿ ಚಾಲು ಆಗುವುದು ರಾತ್ರಿ ಒಂಭತಕ್ಕೆ; ಅರ್ಧ, ಮುಕ್ಕಾಲು ಗಂಟೆಯ ಅವಧಿಗೆ ಮಾತ್ರ. ಪ್ರತಿದಿನ ರಾತ್ರಿ ಈ ಸಮಯಕ್ಕೆ ಯಾವುದೇ ಕೆಲಸ ಇಟ್ಟು ಕೊಂಡಿರುವುದಿಲ್ಲ. ಅದು `ಮುಕ್ತ' ಸಮಯ. ಈ ದಿನಚರಿಯಿಂದ ಮುಕ್ತಿ ಸಿಗಬೇಕೆಂದರೆ `ಮುಕ್ತ' ಧಾರವಾಹಿ ಮುಗಿಯಬೇಕು.

ಅಂದ ಹಾಗೆ `ಮುಕ್ತ' ಧಾರವಾಹಿ ಮುಕ್ತಾಯ ಮಾಡುವ ಮಾತನ್ನು ಟಿ ಎನ್ ಸೀತಾರಾಂ ಉರುಫ್ `ಸಿಎಸ್ಪಿ' ಯವರು ಪ್ರಸ್ತಾಪಿಸಿ ವೀಕ್ಷಕರ ಅಭಿಪ್ರಾಯ ಕೇಳಿದ್ದಾರೆ.

ನಾನು ಸೀತಾರಾಂ ಅವರ ಧಾರವಾಹಿಗಳನ್ನು ಮುಂಚಿನಿಂದಲೂ ನೋಡುತಿದ್ದೇನೆ. ನಾನು ನೋಡಿದ ಅವರ ಮೊದಲ ಧಾರವಾಹಿ ಸಣ್ಣ ಕತೆಗಳನ್ನು ಆಧರಿಸಿದಾಗಿತ್ತು. ಆಗ ಬಹುಶಃ ಒಂಭತ್ತನೆ ತರಗತಿಯಲ್ಲಿ ವ್ಯಾಸಂಗ ಮಾಡುತ್ತಿದ್ದೆ. ಟಿ ವಿ ಕಾರ್ಯಕ್ರಮಗಳ ಬಗ್ಗೆ ಕಿಂಚಿತ್ತೂ ಆಸಕ್ತಿ ತೋರಿಸದ ನನ್ನ ತಾಯಿಗೆ `ಮಾಯ ಮೃಗ' ಅಚ್ಚುಮೆಚ್ಚಿನ ಧಾರವಾಹಿ ಆಗಿತ್ತು. ನನ್ನ ಈಗಿನ ಬಿಡುವಿಲ್ಲದ ದಿನಚರಿಯಲ್ಲಿ ಹೇಗಾದರು ಮಾಡಿ ಪ್ರತಿದಿನ `ಮುಕ್ತ'ಕ್ಕಾಗಿ ಅರ್ಧ ಗಂಟೆ ಕಾಲವಕಾಶ ಮಾಡಿಕೊಳ್ಳುತ್ತಿದ್ದೇನೆ. ಸೀತಾರಾಂ ನಿರ್ದೇಶನದ ಚಲನಚಿತ್ರ `ಮತದಾನ'ವನ್ನೂ ನೋಡಿದ್ದೇನೆ.

ಕೇವಲ ಅವರ ಧಾರವಾಹಿಗಳೇ ಅಲ್ಲ, ಅವರನ್ನೂ ಒಮ್ಮೆ ನೋಡಿದ್ದೇನೆ..ನಾನಾಗ ಹಾಸನದ ಟಿ ವಿ ಅಂಗಡಿಯೊಂದರಲ್ಲಿ ಸೇಲ್ಸ್ ಬಾಯ್ ಕೆಲಸ ಮಾಡುತ್ತಿದ್ದೆ.ಅವರ ಧಾರವಾಹಿಯೊಂದು ದೂರದರ್ಶನದಲ್ಲಿ ಪ್ರಸಾರವಾಗುತ್ತಿತ್ತು. ಹೆಸರು ನೆನಪಿಲ್ಲ. ಅದರ ಚಿತ್ರೀಕರಣ ಚಿಕ್ಕಮಗಳೂರಿನಲ್ಲಿ. ಸೀತಾರಾಂ ತಂಡ ಚಿಕ್ಕಮಗಳೂರಿಗೆ ಹೋಗುವ ಮಾರ್ಗದಲ್ಲಿ ಹಾಸನ ತಲುಪಿದಾಗ ಸಂಜೆ ಏಳು ಮುವತ್ತು ಆಗಿತ್ತು. ಅದು ಧಾರವಾಹಿ ಪ್ರಸಾರದ ಸಮಯ. ಆಗ ನಾನಿದ್ದ ಟಿ ವಿ ಅಂಗಡಿಗೆ ತಮ್ಮ ತಂಡದ ಮೂರು-ನಾಲ್ಕು ಕಲಾವಿದರೊಂದಿಗೆ (ಅವರಲ್ಲಿ `ಸದಾನಂದ ಪಟೇಲ'ರೂ ಇದ್ದರು) ಬಂದು ಟಿ ವಿ ಹಾಕಿಸಿ ತಮ್ಮ ಧಾರವಾಹಿಯನ್ನು ವೀಕ್ಷಿಸಿದ್ದರು. ಆಗ ಅವರ ಆಟೋಗ್ರಾಫ್ ಸಹ ಪಡೆದುಕೊಂಡಿದ್ದೆ. ಅದೊಂದು ರೊಮಾಂಚನದ ಕ್ಷಣವಾಗಿತ್ತು. ಸಾಮಾನ್ಯವಾಗಿ ಅಂಗಡಿಯಲ್ಲಿ ಫ್ಯಾನ್ ಇದ್ದರು ನಮ್ಮ ಮಾಲೀಕರು ಬಳಸುತ್ತಿರಲಿಲ್ಲ. ಅಂದು ಅವರು ಸಹ ಅಂಗಡಿಯಲ್ಲಿರಲಿಲ್ಲ. ಅವರ ಪತ್ನಿ ಇದ್ದರು. ಸೀತಾರಾಂ ನವರ ಕೃಪೆಯಿಂದ ಅಂದು ಫ್ಯಾನ್ ಚಾಲು ಆಗಿತ್ತು!!!!!!!

ಧಾರವಾಹಿಯಿಂದ ಧಾರವಾಹಿಗೆ ಸೀತಾರಾಂ ಜನಪ್ರಿಯತೆ ಬೆಳೆಯುತ್ತಾ ಬಂದು ಈಗ ಅವರು ವಿಶಿಷ್ಟ ಸ್ಥಾನ ಪಡೆದುಕೊಂಡಿದ್ದಾರೆ. ಸುಮಾರು ಆರು ನೂರು ಕಂತುಗಳ ನಂತರವೂ `ಮುಕ್ತ'ದ ಜನಪ್ರಿಯತೆ ಮಾಸಿಲ್ಲ. ಅರುಣಾಚಲ ಮೂರ್ತಿ ಕೊಲೆ ಪ್ರಕರಣ ಬಹಳ ದಿನಗಳಿಂದ ನಡೆಯುತ್ತಿದ್ದು `ಒಂದಿಷ್ಟು ಹೆಚ್ಚಾಯಿತು' ಎಂದೆನಿಸಿರುವುದನ್ನು ಬಿಟ್ಟರೆ ಮತ್ತೆಲ್ಲೂ `ಮುಕ್ತ' ಸಪ್ಪೆ ಆಗಿಲ್ಲ. `ಮುಕ್ತ' ನನ್ನ, ನಿಮ್ಮ, ಎಲ್ಲರ ಕತೆ. ಹಾಗಾಗಿ ಅದು ಎಂದಿಗೂ `ಸಾಕು' ಅನ್ನಿಸುವುದಿಲ್ಲ.

`ಮಾಯ ಮೃಗ', `ಮನ್ವಂತರ', `ಮುಕ್ತ' ಇವೆಲ್ಲಾ ಎಲ್ಲೋ ಒಂದು ಕಡೆ ಸಮಾನ ಎಂದನಿಸುತ್ತೆ. ಹಾಗಾಗಿ ಸೀತಾರಾಂ ನವರು `ಮುಕ್ತ' ಧಾರವಾಹಿಯು ಜನಪ್ರಿಯತೆಯ ಉತ್ತುಂಗದಲ್ಲಿ ಇರುವಾಗಲೇ ಅದನ್ನು ಒಂದು ತಾರ್ಕಿಕ ಅಂತ್ಯಕ್ಕೆ ತಂದು ನಿಲ್ಲಿಸಿ, ಬದಲಾವಣೆಗೋಸ್ಕರ ಹೊಸ ತರಹದ ಕಾರ್ಯಕ್ರಮ ನಿರ್ಮಿಸಿದರೆ ಚೆನ್ನಾಗಿರುತ್ತೆ. ಇದು ನನ್ನ ವೈಯುಕ್ತಿಕ ಅಭಿಪ್ರಾಯ.

ಜಾಗತೀಕರಣ ನಮ್ಮ ಮುಂದಿರುವ ಬಹು ದೊಡ್ಡ ಸವಾಲು. ಈ `ಕಾಣದೊಂದು ಹಸ್ತ' ನಮ್ಮನ್ನು ಹೇಗೆ ಸೆಳೆದುಕೊಳ್ಳುತ್ತಿದೆ, ಅದರ ಪರಿಣಾಮಗಳೇನು ಎಂಬುದನ್ನು `ಮುಕ್ತ'ದ ಮೂಲಕ ತೋರಿಸಿಕೊಟ್ಟಿದ್ದಾರೆ. ಈ ಜಾಗತಿಕರಣವನ್ನು ದಿಟ್ಟವಾಗಿ ಎದುರಿಸ ಬೇಕೆಂದರೆ ಮೊದಲು ನಾವು(ಜನತೆ) ಶಿಸ್ತು ಬದ್ದರಾಗಬೇಕು, ಪ್ರಾಮಾಣಿಕತೆ ಬೆಳೆಸಿಕೊಂಡು ಜಾಗೃತರಾಗಿರಬೇಕು. ನಮ್ಮಲ್ಲಿರುವ ಭ್ರಷ್ಟಾಚಾರವನ್ನು ಪೋಷಿಸಿಕೊಂಡು ಅಥವ ಅದನ್ನು ನಿರ್ಲಕ್ಷಿಸಿ ಜಾಗತಿಕರಣದ ಸವಾಲುಗಳನ್ನು ಎದುರಿಸಲು ಹೊರಟರೆ ನಾವು ಚಕ್ರವ್ಯೂಹದೊಳಗೆ ಸಿಲುಕಿಕೊಳ್ಳಬೇಕಾಗುತ್ತದೆ.ನಮ್ಮ ಅಸ್ತಿತ್ವನ್ನೇ ಕಳೆದುಕೊಳ್ಳುತ್ತೇವೆ. ಜಾಗತಿಕರಣವನ್ನು ನಮ್ಮ ಲಾಭಕ್ಕೆ ಬಳಸಿ ಕೊಳ್ಳಬೇಕೆಂದರೆ ನಮ್ಮಲ್ಲಿ ನಾವು ಶಿಸ್ತು, ಪ್ರಾಮಾಣಿಕತೆ, ಜಾಗೃತಿಯನ್ನು ಬೆಳಸಿಕೊಳ್ಳಬೇಕಾಗುತ್ತದೆ. ಇದಕ್ಕಿಂತ ಮುಂಚೆ ವ್ಯವಸ್ಥೆಯ ಬಗ್ಗೆ ನಮ್ಮಲ್ಲಿರುವ ಸಿನಿಕತನವನ್ನು ತೆಗೆದು ಹಾಕಬೇಕು. ನಮ್ಮನ್ನು ಆಳುವ, ನಿರ್ದೇಶಿಸುವವರನ್ನು ಪ್ರಶ್ನಿಸುವುದನ್ನು ಕಲಿಯಬೆಕು. ಈ ನಿಟ್ಟಿನಲ್ಲಿ ಸೀತಾರಾಂ ಅವರು ಹೊಸ ಪಾತ್ರವನ್ನು ವಹಿಸಬಹುದು.

ಸೀತಾರಾಂ ತಮ್ಮ ಮೊನಚು ಮಾತುಗಳಿಗೆ, ವಿಡಂಬನೆಗೆ, ಅಧ್ಯಯನಶೀಲತೆಗೆ, ಸಮಾಜದ ಅಂಕುಡೊಂಕುಗಳನ್ನು ಕಣ್ಣಿಗೆ ರಾಚುವಂತೆ ತೋರಿಸಲು ಸಮರ್ಥರು. ನಮ್ಮ ರಾಜಕಾರಣಿಗಳನ್ನು, ಆಳುವವರನ್ನು ಸದಾ ಎಚ್ಚರದ ಸ್ಥಿತಿಯಲ್ಲಿ ಇರಿಸಲು ಅವರು ಸಂದರ್ಶನಾಧರಿತ ( ಹಿಂದಿಯ `ಆಪ್ ಕಿ ಅದಾಲತ್ ', ಎನ್ ಡಿ ಟಿ ವಿಯ `ಬಿಗ್ ಫೈಟ್ ' ತರಹ) ಕಾರ್ಯಕ್ರಮಗಳನ್ನು ನಡೆಸಿಕೊಟ್ಟರೆ ಸೀತಾರಾಂ ಕನ್ನಡದ ಕರಣ್ ಥಾಪರ್ ಆಗಬಹುದು. ಅವರ ಪ್ರತಿಭೆ ಮತ್ತು ಜನಪ್ರಿಯತೆಯಿಂದಾಗಿ ಇಂತಹ ಕಾರ್ಯಕ್ರಮ ಯಶಸ್ವಿ ಆಗುವುದರಲ್ಲಿ ಸಂದೇಹ ಇಲ್ಲ.